FIKHU-LEGJISLACIONI I ADHURIMEVE

Në kuadrin e kushtëzimit të aftësisë (si kusht që ka të bëjë veçmas me obligimin e haxhit), nga juristët muslimanë është trajtuar shqyrtimi i llojeve dhe kushteve të aftësisë (mundësisë) në lidhje me haxhin, si vijon:

Shqyrtimi i parë: Llojet e aftësisë (si kusht i obligimit të haxhit)
Klasifikimet e aftësisë për kryerjen e haxhit dhe umres janë katër:
Klasifikimi i parë: Personi të jetë i aftë (i mundshëm) fizikisht dhe financiarisht; mendimi konsensual (i të gjithë) dijetarëve muslimanë është se i këtilli e ka detyrim që ta kryejë vetë haxhin dhe umren.
Klasifikimi i dytë: Personi të mos jetë i aftë (i mundshëm) as fizikisht dhe as financiarisht; mendimi konsensual (i të gjithë) dijetarëve muslimanë është se i këtilli nuk e ka detyrim që ta kryejë haxhin dhe umren (pra prej tij hiqet ky obligim).
Klasifikimi i tretë: Personi të jetë i aftë (i mundshëm) fizikisht, por jo financiarisht; të gjithë juristët muslimanë (pa asnjë diskutim) janë të mendimit se i këtilli nuk është i obliguar ta kryejë haxhin dhe umren, përveç nëse kryerja e tyre nuk varet nga paratë, si p.sh. nëse ky person është nga banorët e Mekës dhe nuk e ka të vështirë të dalë në mashair (vendet e ritualeve përkatëse të haxhit / umres).
Klasifikimi i katërt: Personi të jetë i aftë (i mundshëm) financiarisht, por jo fizikisht, për shkak të një paaftësie që nuk mund të eliminohet; i këtilli e ka për detyrë (obligim) ta kryejë haxhin dhe umren duke dërguar dikë (bedel / zëvendës) në vend të tij.

Shqyrtimi i dytë: Konditat (Kushtet) e aftësisë (si kusht i obligimit të haxhit)
Parashtresa e parë: Kushtet e përgjithshme të aftësisë (mundësisë) për burrat dhe gratë
Kushti i parë: Aftësia fizike, e cila përfshin shëndetin fizik dhe aftësinë për të ecur dhe hipur (qëndruar në gjënë a mjetin e transportit).
Kushti i dytë: Aftësia financiare, e cila përfshin furnizimin (për udhëtim), gjënë (mjetin) e transportit dhe shpenzimin (paratë e nevojshme për këtë udhëtim a rrugëtim), që duhet të teprojnë pasi të jetë hequr (llogaritur) borxhi, si dhe shpenzimet dhe nevojat (për përgjegjësitë) themelore të personit (që synon të kryej haxhin).
Kushti i tretë: Aftësia (Mundësia) e sigurisë, gjë me të cilën nënkuptohet siguria rrugore (pra një rrugëtim a udhëtim i parrezikuar).

Parashtresa e dytë: Kushtet e aftësisë (mundësisë) veçanërisht për gratë
Kushti i parë: Mahremi (pra shoqërimi i gruas prej një mashkulli mahrem, që është: bashkëshorti i saj apo çdo mashkull i rritur me të cilin asaj i ndalohet përjetësisht martesa).
Kushti i dytë: Të mos jetë në iddet (kohëpritjen para ri/kurorëzimit).