SI TË SILLEMI ME KË FYEN SIMBOLET ISLAME

Pjesa më e madhe e sulmeve të këtyre fushatave të padrejta, kanë pasur në shënjestër fenë islame, duke u ditur fakti se ajo përbën mesazhin përmbyllës hyjnor dhe lidhjen përmbaruese të njeriut me shpalljet hyjnore më të fundit. Së këtejmi, nuk është për t’u çuditur t’i gjesh shigjetat e atyre që sulmojnë ligjin hyjnor, t’i drejtohen të unifikuara Islamit dhe muslimanëve. Madje këto shigjeta hidhen pa rreshtur edhe nga persona që i përkasin mendësive të ndryshme konfliktuale mes tyre, por që i kanë lënë mënjanë armiqësitë e tyre dhe i janë kushtuar përpjekjeve për t’i penguar muslimanët në kapjen e fortë për parimeve të tyre fetare dhe për t’i lëkundur ata në bazat solide të fesë së tyre.

Prej sprovave të mëdha me të cilat ballafaqohet vazhdimisht bashkësia muslimane është edhe lufta ideologjike e cila – Allahu na ruajttë! – ka ndikuar deri edhe në bindjet fetare parimore islame të disa prej bijve të Bashkësisë Islame, ka lëkundur sigurinë e besimit të këtyre të fundit dhe i ka shtyrë këta të mashtrohen me ideologjitë e tjera, ta lënë në harresë fenë e tyre e madje të shkojnë deri në tallje dhe përçmim të ligjit të Zotit të tyre dhe ndjekësve të Tij.

Disa nga format e këtij sulmi vërehen haptaz sidomos në të ashtuquajturat “sheshet e dialogut”, shumica dërrmuese e të cilave nuk ngrihen mbi parime të shëndosha dhe etikë të lartë, por ngrihen mbi shpifje, gënjeshtra dhe informacione të trilluara e të pabaza; edhe nëse disa prej këtyre “dialoguesve” dalin të veshur me petkun e gazetarit gjasme të paanshëm dhe të ditur, që në fakt vetëm sa vjell dyshime të paqena dhe helmon publikun e gjerë.

Pavërtetësitë që thuhen kundër Islamit dhe muslimanëve në këto “sheshe”, nuk i takojnë kurrsesi kapitullit të lirisë së mendimit dhe shprehjes, por i takojnë shfrenimit në blasfemi dhe shthurje. Nuk është prej lirisë që të flasësh për Zotin pa dituri e pa kompetencë, të tallesh me besimin e miliarda njerëzve dhe të vjellësh mosbesim e ateizëm përmes mediumeve manipuluese, që i lakojnë tekstet e fjalët në favor të pavërtetësisë dhe shpërfytyrimit të së vërtetës.

Është detyrë e dijetarëve dhe porpaganduesve muslimanë, që ta ndriçojnë Bashkësinë Muslimane lidhur me rrezikun e këtij grupacioni njerëzish, si dhe ta mbrojnë popullatën muslimane nga mendësitë e të këtillëve. Kujdes duhet të tregohet sidomos për mbrojtjen nga sa në fjalë, të grave dhe të rinjve muslimanë, pasi këto dy grupe janë objektivi i këtyre grupacioneve dashakeqe, nisur nga ndikimi i madh që kanë gratë dhe të rinjtë muslimanë në shoqërinë islame.

Çdo musliman/e që i ka kapacitetet e mësipërme, me shumë gjasa e ka për detyrë të jetë aktiv në këtë çështje, bazuar në thënien e Allahut të Madhëruar: “… prej çdo bashkësie (muslimane), një grup të mbetet mbrapa, që të thellohet në mësimin e fesë dhe kështu të këshillojë popullin e vet…”¹

Thirrësi musliman nuk duhet kurrsesi të bie pre e provokacioneve të këtyre grupacioneve dashakeqe dhe bëhet palë me ta në shkëmbim sharjesh e provokacionesh, pasi e tillë gjë shpie në shuarjen e objektivit të muslimanit dhe ndezjen e synimit të dashakeqëve të tij.²

QËNDRIMI NDAJ DYSHIMEVE FETARE