DHËNIA E ZEKATIT NË INTERES TË XHAMISË - JETA E VËRTETË

Numri i fetvasë: 163 DHËNIA E ZEKATIT NË INTERES TË XHAMISË

Kategoria: ZEKATI DHE NDËRTIMI I XHAMIVE

5 597 shfletues/klikues DHËNIA E ZEKATIT NË INTERES TË XHAMISË

Pyetje: DHËNIA E ZEKATIT NË INTERES TË XHAMISË

A bën që Zekati i Pasurisë dhe ai i Fitrit të jepet për ndërtim xhamishë apo mbarëvajtjen e veprimtarive të xhamive dhe shoqatave të ndryshme islame?

Përgjigjja: DHËNIA E ZEKATIT NË INTERES TË XHAMISË

Falënderimi absolut i takon Allahut! Mëshira, lavdërimi edhe paqja qofshin mbi të Dërguarin e Allahut!

Mendimi bazë, i cili përbën mendimin thuajse konsensual të dijetarëve të tre gjeneratave të para muslimane, si dhe mendimin e shumicës së dijetarëve muslimanë, është se zekati i pasurisë jepet vetëm në tetë (8) kanalet (kategoritë/grupet)¹, prej të cilave është edhe kategoria “në Rrugën e Allahut”, e cila është e veçantë për “përpjekjen e armatosur (xhihadin).²Lexoni më tepër

Kuse lidhur me dhënien e zekatit për financimin, ndërtimin apo mbarëvajtjen e xhamive dhe shoqatave të ndryshme islame, thuhet sa vijon:

Lejimi ose jo i dhënies së zekatit për interesat e xhamive, shoqatave islame etj. (sidomos atyre që s’arrijnë t’i plotësojnë nevojat e tyre bazë materiale, si: shpenzimet e domosdoshme për mbarëvajtjen e tyre, qeratë etj., nga kontributet vullnetare dhe fondet jozekatore), bazohet në çështjen juridike islame “A i përfshin apo jo artikulli zekator ‘në Rrugën e Allahut’, veprimtaritë që bëhen në kuadrin e thirrjes islame (davetit) dhe ngjashëm me to?”

Një mendim i mirëargumentuar, i cili përbën mendimin e disa sahabëve, tabi’inëve, juristëve të medh’hebeve kryesore dhe shumë institucioneve dhe personaliteteve bashkëkohore të jurisprudencës islame³, është se zeqati lejohet t’u jepet shoqatave islame dhe ngjashëm, të cilat kontribuojnë në fushën e thirrjes islame, me konsideratën (arsyetimin) se thirrja islame (daveti) i përket kategorisë “në Rrugën e Allahut”.

Në mbështetje të këtij mendimi ka ardhur edhe fetvaja (direktiva) juridike e Kongresit të Parë për Çështjet Bashkëkohore të Zekatit, si vijon: “Me kanalin (zekator) ‘në Rrugën e Allahut, synohet kuptimi i gjerë i xhihadit (përpjekjes / mobilizimit) të ardhur në theksimet e juristëve, në kuptimin e ruajtjes së fesë dhe lartimit të fjalës së Allahut, ku krahas përpjekjes së armatosur përfshihet edhe: thirrja (daveti) në Islam, puna për të zbatuar ligjin islam, kundërpërgjigjet ndaj dyshimeve që provokojnë kundërshtarët e Islamit dhe zmbrapsjen e rrymave armiqësore që veprojnë kundër tij.

Së këtejmi, xhihadi (përpjekja / mobilizimi) nuk kufizohet vetëm me veprimtaritë ushtarake, por në kuptimin përfshirës të tij (xhihadit) hyjnë edhe sa vijon:…

(b) mbështetja financiare e qendrave të thirrjes (davetit) që ftojnë në Islam në vendet joislame, të cilat drejtohen nga persona të besueshëm dhe kanë për qëllim përhapjen e Islamit në këto vende me tërë rrugët e larmishme të sakta, të përshtatshme për kohën. E këtij konteksti është çdo xhami që është ngritur në vendet joislame dhe shërben si vatër e thirrjes (davetit) islame;

(c) mbështetja financiare e përpjekjeve që përforcojnë Islamin dhe i japin atij qëndrueshmëri ndër pakicat islame në vendet ku muslimanët qeverisen prej jomuslimanëve dhe u ekspozohen planeve asimiluese…”⁴Lexoni më tepër

Po në këtë kontekst, dijetari i njohur Abdullah Ibn Xhibrini (Allahu e mëshiroftë!), kur është pyetur për dispozitën e dhënies së zekatit për themelimin e një qendre islame, ka thënë:

“Nuk ka asnjë pengesë që ky projekt të ndërtohet nga kapitalet e zekatit, duke qenë se e tillë gjë konsiderohet në Rrugën e Allahut, nisur nga fakti se ky projekt përmban mësim të Kuranit, teuhidit (monoteizmit / besimit në një Zot të Vetëm e të Pashoq), dispozitave sheriatike (ligjore islame), thirrjes tek Allahu i Madhëruar; dhe kjo [e gjitha] hyn në Rrugën e Allahut, duke qenë se afron tek Allahu dhe konsiderohet prej punëve sheriatike më të mira, ashtu si përballja e armatosur me jobesimtarët me qëllimin e futjes së tyre në Islam. Nëse ka para (fonde monetare) nga kontributet (vullnetare), produktet e vakëfeve dhe ngjashëm, ato jepen në llogari të këtij projekti, por nëse këto [që u përmendën më sipër] ndërpriten dhe [për financimin e të këtillë projekti] ekzistojnë fonde vetëm nga paratë e zekatit, në këtë rast lejohet që ai (zekati) të jepet për këtë.”⁵

– Në mbyllje na mbetet të themi, se mendimi parësor (superior) lidhur me faktin nëse artikulli “në Rrugën e Allahut” është apo jo i veçantë për përpjekjen e armatosur në Rrugën e Allahut, është si vijon:

Artikulli “në Rrugën e Allahut” është i veçantë për xhihadin (përpjekjen e armatosur) dhe angazhimet përkatëse të tij, ku hyjnë: shpenzimet për luftëtarët, pajimet dhe ngjashëm. Gjithsesi lejohet që konsiderata (arsyetimi) “në Rrugën e Allahut” (dhe së këtejmi zekati që jepet për këtë kategori), t’u jepet veprimtarive të domosdoshme e thelbësore islame (sidomos në vendet joislame) të shoqatave dhe institucioneve islame që kontribuojnë në fushën e thirrjes islame, kur fondet që përfitohen nga burimet jozekatore nuk janë të mjaftueshme për financimin e veprimtarive në fjalë. Në këtë rast zekati lejohet të jepet bazuar në mendimin e juristëve muslimanë që thonë se këto veprimtari hyjnë në artikullin “në Rrugën e Allahut”, kurse përndryshe nuk lejohet.

Po kështu, nisur nga mendimi i shumicës së dijetarëve muslimanë, se kategorive që u jepet zekati i pasurisë, u jepet gjithashtu edhe zekati i fitrit; bazuar në këtë mendim, nuk ka problem që krahas zekati të pasurisë, veprimtarive islame në fjalë t’u jepet dhe zekati i fitrit.⁶

Allahu e di më mirë. DHËNIA E ZEKATIT NË INTERES TË XHAMISË

Ju ftojmë ta shpërndani këtë postim, që të përhapet dobia e tij dhe së bashku të marrim shpërblimin e publikuesit të fjalës së mirë.

_____ DHËNIA E ZEKATIT NË INTERES TË XHAMISË

DHËNIA E ZEKATIT NË INTERES TË XHAMISË

Poshtëshënim:

Këto tetë kategori janë përmendur në suren (kaptinën kuranore) Et-Teube, në ajetin (versetin) 60-të të saj.
Shih: islamqa.
Shih: islamtoday, islamtoday dhe islamqa.
Shih: Fetava Ue Teusijetu Neduati Kadaja Ez-Zekati El-Muasira (25) – islamqa, islamtoday dhe islamtoday.
Shih: ibn-jebreen (pyetja 31); shih gjithashtu pyetje-përgjigjet: 2, 7, 8, 16, 19, 32, 33 (në të njëjtin link).
Shih: islamweb dhe islamweb.

Të afërta

Shpërndajeni Fjalën e Mirë: